[Giornale Centro Sicilia] Каникати, светска престолнина на поезијата: заврши XI издание на меѓународниот конкурс „Il Parnaso – Premio Angelo La Vecchia“

Триесет држави, околу 300 поети, 220 поетски творби во новата балканска секција - Татарот во Каникати „Театро Сочале“ беше домаќин на ден исполнет со исклучителен културен интензитет, во знакот на поезијата како универзален јазик на убавината и мирот.

Каникати уште еднаш се потврдува како град способен преку поезијата да му се обрати на светот. Во четвртокот, на 22 октомври, заврши XI издание на Меѓународниот поетски конкурс „Il Parnaso – Premio Angelo La Vecchia“, организиран од Културното здружение МЕТА, со ден целосно посветен на културата, средбите меѓу народите и афирмацијата на поезијата, кој го претвори Театро Сочале во меѓународно средиште на гласови, јазици и поетски сензибилитети.

Овој веќе традиционален настан, кој од година во година бележи раст и кој, благодарение на учеството на поети од сите делови на светот, придонесува Каникати да стане вистинска светска престолнина на поезијата.

Триста поети од триесет држави

Во попладневните часови, Театро Сочале беше домаќин на главната манифестација на XI издание, посветена на различните секции на конкурсот и прогласувањето на победниците.

Настанот го водеа проф. Калоџеро Ла Векија и Виторио Мура, кои ја придружуваа публиката низ доделувањето на различните признанија, посветувајќи внимание на наградите и на главните учесници во ова особено богато издание.

Бројките го потврдуваат значењето на иницијативата: околу 300 поети од 30 држави, што сведочи за меѓународната мрежа која низ годините се зацврстувала и проширувала.

Особено интересни се соработките со поетски и културни средини од земји кои често се географски оддалечени, но блиски преку пишаниот збор: Дагестан, Крим, Украина, Русија, Белорусија, Полска, Македонија и бројни други меѓународни средини. Значајна е и соработката со Меѓународното здружение на писатели (International Guild of Writers).

Овој мозаик од култури и традиции ја потврдува меѓународната определба на Парнасо и неговата способност да ја претвори поезијата во слободен простор за средби, особено во историски момент кога дијалогот меѓу народите добива уште поголемо значење.„Општина Каникати го поддржува нашиот конкурс уште од неговото прво издание“, истакнува уметничкиот директор. „Преку поезијата го промовираме името на Каникати и Сицилија, а благодарение и на нашиот конкурс и на Академијата Парнасо, стануваат центар од кој се шири убавината!“

Ars Lyrica Balcanica: поезијата го обединува Балканот

Меѓу најзначајните новини на ова XI издание се издвојува новата секција „Ars Lyrica Balcanica“, создадена во рамките на конкурсот и раководена од македонската поетеса и писателка Кристина Краличин, која присуствуваше на манифестацијата.

Проектот постигна забележителен успех, вклучувајќи ги земјите од балканскиот регион и собирајќи дури 220 поетски творби.

„Многу сум задоволна од резултатот на оваа секција, во која беа вклучени сите балкански земји. Пристигнаа 220 песни. Ѝ благодарам на организацијата на конкурсот што ми ја даде оваа можност и се надевам дека ќе продолжиме да соработуваме за ширење на поезијата како универзален јазик на мирот!“, изјави Кристина Краличин.

Ова искуство дополнително ја збогатува меѓународната димензија на Парнасо и отвора нови перспективи за културна соработка меѓу различните европски средини.

Сликарството ја придружува поезијата

За манифестацијата да биде уште повпечатлива придонесе и присуството на сцената на македонската сликарка Жаклина Николовска, која за време на настанот создаде слика, придружувајќи го со својата уметност одвивањето на целокупната програма.

Дијалогот меѓу поезијата и сликарството, меѓу зборот и сликата, додаде уште една уметничка димензија на настанот кој веќе беше богат со содржини.

Присутен беше и проф. Гаетано Ауџело, веќе познат како „патувачкиот промотор на Парнасо“, личност која со својот ентузијазам и активност придонесува за ширењето и промоцијата на конкурсот.

Мрежа на соработки за проект што продолжува да расте

На крајот од манифестацијата, проф. Калоџеро Ла Векија упати искрена благодарност до сите што придонесоа за реализацијата на настанот.

Посебно признание им беше упатено на вработените во општинската служба „Културни настани“, раководена од д-р Барбагало, со поддршка на д-р Маркезе Рагона, за нивната соработка и организациска помош.

Посебна благодарност беше упатена и до Културното здружение „Атена“, со неговиот претседател, адвокатот Џовани Салваџо, чија постојана и драгоцена поддршка веќе стана неопходна за успешната реализација на манифестацијата.

Конкурсот, кој уште од своето прво издание се одржува под покровителство на Општина Каникати, денес претставува едно од најзначајните културни искуства во регионот, способно да го пренесе името на градот далеку над националните граници.

Манифестацијата беше пренесувана во живо на Фејсбук-страницата на конкурсот.

Така завршува уште едно издание на Парнасо, но патувањето на поезијата не завршува. Остануваат зборовите, средбите, односите изградени меѓу различните народи и, пред сè, свеста дека дури и од еден град на Сицилија може да тргне порака способна да допре до целиот свет.

Затоа што поезијата нема граници и, кога станува повод за средба, може да се претвори во извонреден универзален јазик на убавината и мирот.

Содржината е преземена од медиумот Giornale Centro Sicilia, линк до оригиналната содржина.