Извадок од делото „И“ објавен во списанието Книжевни елементи (пролет/есен 2025)

Во најновиот број на списанието Книжевни елементи (година V, број 12/13, пролет/есен 2025), во издание на здружението Перун Артис од Битола, објавен е извадок од прозното дело „И“ на македонската авторка Кристина Краличин. Делото е во најтесен избор за книжевната награда „Пегаз“ за 2024 година и е објавено во издание на „Арс Ламина“ во 2025 година.

Книжевни елементи е списание за современа светска книжевност кое објавува поезија, проза, драма и есеистика од домашни и странски автори, со цел поттикнување на книжевниот дијалог и културната размена. Во делот „Од ова копно“, посветен на современата македонска книжевност, покрај Кристина Краличин се застапени и автори како Бранко Цветковски, Владимир Илиевски, Кица Колбе, Иво Митев, Дејан Дуковски и други автори од современата македонска книжевна сцена.

Списанието содржи и интернационален сегмент „Меридијани“, во кој се објавени дела од автори од повеќе земји, меѓу кои Србија, Романија, Германија, Босна и Херцеговина, САД и Кина, како и тематски блок „Земја во фокус: Естонија“, посветен на современата естонска книжевност. Во овој сегмент се застапени автори како Андрус Кивирјахк, Кристиина Ехин, Дорис Карева, Илмар Лехтпере, Мартин Алгус, Пирет Јаакс, Мехис Пихла и други значајни претставници на естонската книжевна сцена.

Извадокот од делото „И“ на Кристина Краличин е објавен во рамки на изборот на современа македонска проза и претставува дел од нејзиното поново книжевно творештво, кое тематски се занимава со сложените психолошки состојби, семејните односи и внатрешните процеси на соочување и трансформација.

Објавувањето во списанието Книжевни елементи, кое претставува платформа за современа книжевна продукција со национален и меѓународен карактер, ја потврдува присутноста на делото „И“ во тековните книжевни текови и неговата актуелност во рамки на современата македонска литература.